နေပြည်တော် နိုဝင်ဘာ ၁၄

ပြည်ထောင်စုသမ္မတမြန်မာနိုင်ငံတော်၊ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်း စုကြည်သည် ယနေ့တွင် ဗီဒီယိုကွန်ဖရင့်စနစ်ဖြင့် ကျင်းပပြုလုပ်သည့် (၂၃)ကြိမ်မြောက် အာဆီယံအပေါင်းသုံး ထိပ်သီးအစည်းအဝေးနှင့် (၁၅) ကြိမ်မြောက် အရှေ့အာရှထိပ်သီးအစည်း အဝေးတို့သို့ နေပြည်တော်ရှိ နိုင်ငံခြားရေးဝန်ကြီးဌာနမှ ပါဝင်တက်ရောက်ခဲ့သည်။

(၂၃)ကြိမ်မြောက် အာဆီယံအပေါင်းသုံးထိပ်သီးအစည်းအဝေးတွင် အာဆီယံ၏ အလှည့်ကျ ဥက္ကဋ္ဌ ဖြစ်သည့် ဗီယက်နမ်ဆိုရှယ်လစ်သမ္မတနိုင်ငံ ဝန်ကြီးချုပ် Mr. Nguyen Xuan Phuc က သဘာပတိအဖြစ် ဆောင်ရွက်ပြီး၊ အစည်းအဝေးသို့ အာဆီယံအဖွဲ့ဝင်နိုင်ငံများ၊ တရုတ်ပြည်သူ့ သမ္မတနိုင်ငံ၊ ဂျပန်နိုင်ငံနှင့် ကိုရီးယားသမ္မတနိုင်ငံတို့မှ ခေါင်းဆောင်များ ပါဝင်တက်ရောက်ခဲ့ကြ သည်။ ထိပ်သီးအစည်းအဝေးတွင် ခေါင်းဆောင်များက အာဆီယံ အပေါင်းသုံးနိုင်ငံများအကြား အနာဂတ်တွင် ပူးပေါင်းဆောင်ရွက်မှုတိုးမြှင့်နိုင်မည့် အခြေအနေ များနှင့် ဒေသတွင်းနှင့် နိုင်ငံတကာရေးရာကိစ္စရပ်များအပေါ် အမြင်ချင်းဖလှယ် ဆွေးနွေးခဲ့ကြ သည်။

ခေါင်းဆောင်များက အဓိကမောင်းနှင်အားအဖြစ် အာဆီယံတည်ရှိသည့် အရှေ့အာရှ အသိုက်အဝန်းတစ်ရပ် ထူထောင်ရေးဆိုင်ရာ ရေရှည်ရည်မှန်းချက်ကို အကောင်အထည်ဖော် ဆောင်ရွက်ရာတွင် အာဆီယံအပေါင်းသုံးနိုင်ငံများ၏ ပူးပေါင်းဆောင်ရွက်မှုသည် အရေးပါသည့် အခန်းကဏ္ဍမှ ပါဝင်လျက်ရှိကြောင်း၊ ကူးစက်ရောဂါအလွန် ဒေသတွင်းပြန်လည် နာလန်ထူ‌ရေးကို ဆောင်ရွက်ရာတွင် အာဆီယံအပေါင်းသုံးနိုင်ငံများ၏ ပူးပေါင်းဆောင်ရွက်မှုကို ပိုမိုတိုးတက် ခိုင်မာစေရန် နှင့် COVID-19 ကူးစက်ရောဂါကို ထိရောက်စွာ ကာကွယ်ထိန်းချုပ်နိုင်ရေးအတွက် အာဆီယံအပေါင်းသုံး နိုင်ငံများ၏ ပူးပေါင်းဆောင်ရွက်မှုအခန်းကဏ္ဍကို ပိုမိုမြှင့်တင်ရန် လိုအပ်ကြောင်း ဆွေးနွေးခဲ့ကြသည်။ ထို့ပြင် ခေါင်းဆောင်များက အရှေ့အာရှဒေသ၏ တည်ငြိမ် အေးချမ်းရေးနှင့်ဖွံ့ဖြိုးတိုးတက်ရေးတို့ကို တိုးမြှင့်ဖော်ဆောင်ရာ၌ အာဆီယံအပေါင်းသုံးနိုင်ငံများ၏ ပူးပေါင်းဆောင်ရွက်မှုသည် အရေးကြီးကြောင်း ထုတ်ဖော်ပြောဆိုပြီး၊ လူကုန်ကူးမှု၊ အကြမ်းဖက်မှုနှင့်အစွန်းရောက်မှု စသည့် သမားရိုးကျမဟုတ်သော လုံခြုံရေးကိစ္စရပ်များကို ရင်ဆိုင်ဖြေရှင်းရာတွင် ပူးပေါင်းဆောင်ရွက်မှု ပိုမိုတိုးတက်ခိုင်မာစေရန် ကတိကဝတ်ပြုခဲ့ကြသည်။

အာဆီယံအပေါင်းသုံး ထိပ်သီးအစည်းအဝေးတွင် နိုင်ငံတော်၏အတိုင်ပင်ခံပုဂ္ဂိုလ်က ကူးစက် ရောဂါပျံ့နှံ့မှု၊ စီးပွားရေးအားပြိုင်မှုနှင့် ပထဝီမဟာဗျူဟာအခင်းအကျင်းပြောင်းလဲမှု တို့ကို ရင်ဆိုင် နေကြရသည့်အချိန်တွင် အာဆီယံ အပေါင်းသုံးနိုင်ငံများအကြား စည်းလုံးညီညွှတ်မှု ပိုမိုတိုးတက် ခိုင်မာလျက်ရှိသည်ကို တွေ့မြင်ရသည့်အတွက် ဝမ်းမြောက်ကြောင်း၊ လက်ရှိကာလနှင့် အနာဂတ် တွင် ကြုံတွေ့မည့် ပြည်သူ့ကျန်းမာရေးအရေးပေါ်အခြေအနေကို ရင်ဆိုင်ဖြေရှင်းရာတွင် ပိုမိုအသင့် ရှိစေရန်အတွက် ကျန်းမာရေးစောင့်ရှောက်မှုစနစ်များကို ပြန်လည်ဆန်းသစ်ခိုင်မာ စေရန်အရေးကြီးကြောင်း၊ COVID-19 ကူးစက်ရောဂါဆိုင်ရာ လုပ်ငန်းစဉ်ကို အကောင်အထည် ဖော်ခြင်း၊ နိုင်ငံစုံပူးပေါင်းဆောင်ရွက်ခြင်းဆိုင်ရာ ချင်းမိုင်အစီအစဉ် (CMIM)ကို တိုးတက်ခိုင်မာစေခြင်း၊ မရှိမဖြစ်လိုအပ်သော ကုန်စည်များပို့ဆောင်ရေး လမ်းကြောင်းကို ပြန်လည်ဖွင့်လှစ် ခြင်းနှင့် ဒေသတွင်းပုံမှန်ခရီးသွားလာမှုကို တဖြည်းဖြည်း ပြန်လည်စတင်ခြင်း စသည်တို့မှ တစ်ဆင့် စီးပွားရေးနှင့် ဘဏ္ဍာရေးကြံ့ကြံ့ခံနိုင်စွမ်း ရှိစေရေး အတွက် လက်တွေ့ကျသည့် ပူးပေါင်း ဆောင်ရွက်မှုနှင့် ခိုင်မာသည့် မူဝါဒဆိုင်ရာပေါင်းစပ် ညှိနှိုင်းမှုတို့ကို ဆက်လက်ဆောင်ရွက် သွားကြရန် အရေးကြီးကြောင်း၊ အာဆီယံအပေါင်းသုံး နိုင်ငံများအနေဖြင့် ကမ္ဘာ့ကူးစက်ရောဂါကို ရင်ဆိုင်ကျော်လွှားရေးနှင့် ကူးစက်ရောဂါအလွန် ပြန်လည်နာလန်ထူရေးတို့ကို ကြိုးပမ်း ဆောင်ရွက်ရာတွင် ဒေသတွင်း တည်ငြိမ်အေးချမ်းမှုသည် များစွာအရေးကြီးသည်ဖြစ်၍ အာဆီယံ အပေါင်းသုံးလုပ်ငန်းစဉ် (၂၀၁၈-၂၀၂၂)တွင် ပါရှိသည့် သမားရိုးကျမဟုတ်သော လုံခြုံရေးကိစ္စရပ် များကို ကိုင်တွယ်ဖြေရှင်းရာတွင် ပူးပေါင်းဆောင်ရွက်မှု ပိုမိုတိုးတက်ခိုင်မာစေရန် လိုအပ်ကြောင်း ထည့်သွင်းပြောကြားခဲ့သည်။

(၁၅) ကြိမ်မြောက် အရှေ့အာရှထိပ်သီးအစည်းအဝေးတွင် အာဆီယံ၏ အလှည့်ကျ ဥက္ကဋ္ဌဖြစ်သည့် ဗီယက်နမ်ဆိုရှယ်လစ်သမ္မတနိုင်ငံ ဝန်ကြီးချုပ် Mr. Nguyen Xuan Phuc က သဘာပတိအဖြစ်ဆောင်ရွက်ပြီး အာဆီယံအဖွဲ့ဝင်နိုင်ငံများ၊ ဩစတြေးလျ၊ တရုတ်ပြည်သူ့ သမ္မတနိုင်ငံ၊ အိန္ဒိယ၊ ဂျပန်၊ နယူးဇီလန်၊ ကိုရီးယားသမ္မတနိုင်ငံ၊ ရုရှားနှင့် အမေရိကန်နိုင်ငံတို့မှ ခေါင်းဆောင်များနှင့် ကိုယ်စားလှယ်များ ပါဝင်တက်ရောက်ခဲ့ကြသည်။ ထိပ်သီးအစည်းအဝေးတွင် ခေါင်းဆောင်များက အရှေ့အာရှထိပ်သီးအစည်းအဝေးအဖွဲ့ဝင်နိုင်ငံများအကြား အနာဂတ်တွင် ပူးပေါင်းဆောင်ရွက်မှုတိုးမြှင့်နိုင်မည့် အခြေအနေများနှင့် ဒေသတွင်းနှင့် နိုင်ငံတကာ ရေးရာကိစ္စရပ်များအပေါ် အမြင်ချင်းဖလှယ်ဆွေးနွေးခဲ့ကြသည်။

အရှေ့အာရှထိပ်သီးအစည်းအဝေးထူထောင်ခြင်း (၁၅)နှစ် ပြည့်မြောက်သည့် နှစ်ပတ်လည် အခါသမယတွင် ခေါင်းဆောင်များက အားလုံးနှင့်သက်ဆိုင်သည့် မဟာဗျူဟာ၊ နိုင်ငံရေးနှင့် စီးပွားရေးဆိုင်ရာ ကိစ္စရပ်များကို အတူတကွ ပူးပေါင်းဖြေရှင်းကြရာတွင် အရှေ့အာရှ ထိပ်သီး အစည်းအဝေးကို ခေါင်းဆောင်များဦးဆောင်သည့် အဓိကနေရာတစ်ခုအဖြစ် ပိုမိုတိုးတက်ခိုင်မြဲ စေရန် ထပ်လောင်းကတိကဝတ် ပြုခဲ့ကြသည်။ ထို့ပြင် ခေါင်းဆောင်များက COVID-19 ကူးစက် ရောဂါကို ရင်ဆိုင်တုံ့ပြန်ရာတွင် ထိရောက်မှုရှိသည့် ကုသဆေးနှင့်ကာကွယ်ဆေးများကို အားလုံးက သာတူညီမျှ ခံစားရရှိရေး၏အရေးပါမှုကို အသိအမှတ်ပြုကြပြီး၊ ဘေးကင်းလုံခြုံမှုရှိ၍ အရည်အသွေးပြည့်ဝပြီး၊ ထိရောက်မှုရှိသည့် COVID-19 ကာကွယ်ဆေးများကို အားလုံးက လက်လှမ်းမီသည့် ဈေးနှုန်းဖြင့် သာတူညီမျှခံစားရရှိစေရေးကို ကြိုးပမ်းဆောင်ရွက်သွားကြမည့် ၎င်းတို့၏ကတိ ကဝတ်ကို ထပ်လောင်းအတည်ပြုခဲ့ကြသည်။

အရှေ့အာရှထိပ်သီးအစည်းအဝေးတွင် နိုင်ငံတော်၏အတိုင်ပင်ခံပုဂ္ဂိုလ်က နှစ်ဦးနှစ်ဖက် အကျိုးစီးပွားနှင့် စိုးရိမ်ပူပန်မှုများရှိသည့် နယ်ပယ်များ၌ မဟာဗျူဟာ ဆွေးနွေးမှုနှင့် လက်တွေ့ ပူးပေါင်းဆောင်ရွက်မှုများကို အကောင်အထည်ဖော်ခြင်းအားဖြင့် အာဆီယံနှင့်ဒေသပြင်ပ၏ တည်ငြိမ်အေးချမ်းရေးနှင့် သာယာ ဝပြောရေးကို တိုးမြှင့်ဆောင်ရွက်ရာတွင် အရှေ့အာရှထိပ်သီး အစည်းအဝေး၏ အရေးပါသည့်အခန်းကဏ္ဍကို အသိအမှတ်ပြုကြောင်း၊ အပြန်အလှန် ယုံကြည်မှုနှင့် အပြန်အလှန်နားလည်မှုတို့ကို တိုးမြှင့်တည်ဆောက်ရန်အတွက် အရှေ့အာရှထိပ်သီးအစည်းအဝေး အဖွဲ့ဝင်နိုင်ငံများအကြား ရင်းနှီးပွင့်လင်းစွာ လွတ်လွတ်လပ်လပ် တိုင်ပင်ဆွေးနွေးသည့် အပြုသဘောဆောင်သော အနေအထားကို ပိုမိုတိုးတက်ခိုင်မာစေရန် အရေးကြီးကြောင်း၊ COVID-19 ကူးစက် ရောဂါမှ ဆောလျှင်စွာ ပြန်လည်နာလန်ထူနိုင်ရေးနှင့် အနာဂတ်တွင် ကြုံတွေ့မည့် အကျပ်အတည်းများကို ရေရှည် ကြံ့ကြံ့ခံနိုင်စွမ်း ရှိစေရေးတို့အတွက် လက်တွေ့ကျသည့် ပူးပေါင်းဆောင်ရွက်မှုများကို အရှေ့အာရှထိပ်သီးအစည်းအဝေး၏ မနီလာလုပ်ငန်းစဉ်အောက်မှ တိုးမြှင့်ဖော်ဆောင်သွားကြရန် လိုအပ်ကြောင်း ထည့်သွင်းပြောကြားခဲ့သည်။

ရခိုင်ပြည်နယ်အရေးကိစ္စနှင့် ပတ်သက်၍ ခေါင်းဆောင်အချို့၏ ပြောကြားချက်ကို တုံ့ပြန်ရာတွင် နိုင်ငံတော်၏အတိုင်ပင်ခံပုဂ္ဂိုလ်က ၎င်းတို့နည်းတူ မိမိအနေဖြင့်လည်း ယင်းကိစ္စနှင့်စပ်လျဉ်း၍ စိုးရိမ်ပူပန်မှုရှိသည်ကို ပြောကြားလိုပါကြောင်း၊ COVID-19 ကပ်ရောဂါကဲ့သို့သော စိန်ခေါ်မှု အကျပ်အတည်း များကြားမှ ရခိုင်ပြည်နယ်ရှိ အသိုက်အဝန်းအားလုံး ၏ တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးအတွက် အစိုးရအနေဖြင့် ကြိုးပမ်း ဆောင်ရွက် လျက်ရှိကြောင်း၊ တရားမျှတမှုနှင့် လူ့အခွင့်အရေးတို့နှင့်ပတ်သက်၍ စိန်ခေါ်မှုများစွာရှိစေကာမူ နိုင်ငံတစ်ဝန်း၌ တိုးတက်စေရန် ဆောင်ရွက်လျက်ရှိကြောင်းနှင့် ဒေသနှင့်တစ်ကမ္ဘာလုံး၏ တည်ငြိမ် အေးချမ်းရေးနှင့် သာယာဝပြောရေးအတွက် အရှေ့အာရှထိပ်သီးအစည်းအဝေး အဖွဲ့ဝင် နိုင်ငံအားလုံးနှင့် အနီးကပ် ဆက်လက်ပူးပေါင်းဆောင်ရွက်သွားမည်ဖြစ်ကြောင်း ပြောကြားသည်။

နိုင်ငံတော်၏အတိုင်ပင်ခံပုဂ္ဂိုလ်၏ကိုယ်စား ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဦးသောင်းထွန်းသည် အာဆီယံအပေါင်းသုံး နိုင်ငံခေါင်းဆောင်များနှင့် အရှေ့အာရှစီးပွားရေးကောင်စီ၏ကိုယ်စားလှယ်များ တွေ့ဆုံသည့် အခမ်းအနားသို့ ပါဝင်တက်ရောက် ဆွေးနွေး ခဲ့သည်။ အလားတူ အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန၊ ပြည်ထောင်စုဝန်ကြီးဦးကျော်တင်သည် (၈)ကြိမ်မြောက် အာဆီယံ-အမေရိကန် ထိပ်သီးအစည်းအဝေး၊ အာဆီယံ-နယူးဇီလန် အထိမ်းအမှတ်ထိပ်သီးအစည်းအဝေးနှင့် ဒုတိယ အကြိမ်မြောက် အာဆီယံ-ဩစတြေးလျ ထိပ်သီးအစည်းအဝေး တို့သို့ နိုင်ငံတော်၏အတိုင်ပင်ခံပုဂ္ဂိုလ်၏ကိုယ်စား ပါဝင်တက်ရောက်ဆွေးနွေးခဲ့သည်။ ဆွေးနွေးဖက်နိုင်ငံများနှင့် ကျင်းပပြုလုပ်သည့် ထိပ်သီး အစည်းအဝေး များတွင် ခေါင်းဆောင်များက အနာဂတ်တွင် ပူးပေါင်းဆောင်ရွက်မှု တိုးမြှင့်နိုင်မည့်အခြေအနေများနှင့် ဒေသတွင်းနှင့်နိုင်ငံတကာရေးရာကိစ္စရပ်များကို အမြင်ချင်း ဖလှယ်ဆွေးနွေးခဲ့ကြသည်။

(၈)ကြိမ်မြောက် အာဆီယံ-အမေရိကန် ထိပ်သီးအစည်းအဝေးတွင် အမေရိကန်နိုင်ငံက အာဆီယံနိုင်မှ ကျောင်းသူကျောင်းသားများ အမေရိကန်နိုင်ငံတွင် ပညာသင်ကြားမည့်အခွင့်အလမ်း ပိုမိုရရှိစေမည့် Billion Future Scholars’ အစီအစဉ်ကို ထုတ်ပြန်ကြေညာခဲ့သည်။

အလားတူ အာဆီယံ-နယူးဇီလန် အထိမ်းအမှတ်ထိပ်သီးအစည်းအ‌ဝေး၌ နယူးဇီလန်နိုင်ငံက အာဆီယံ၏ COVID-19 တုံ့ပြန်ရေးရန်ပုံငွေသို့ ဒေါ်လာ ၁ သန်း၊ ကူးစက်ရောဂါတုံ့ပြန်ရေးကို ကူညီပံ့ပိုးရန် ဒေါ်လာ ၁၂ သန်း၊ ဒေသတွင်းအသက်မွေးဝမ်းကျောင်းလုပ်ငန်းများ ရေရှည်ဖွံ့ဖြိုးတိုးတက်ရေးကို ကူညီပံ့ပိုးပေးရန် ဒေါ်လာ ၂၄ သန်း၊ ရာသီဥတုဒဏ်ကို ကြံ့ကြံ့ခံနိုင်သည့် စိုက်ပျိုးရေး လုပ်ငန်းများအတွက် ဒေါ်လာ ၁၀ သန်းနှင့် ရေအရင်းမြစ်စီမံခန့်ခွဲမှုအတွက် မဲခေါင်ကော်မရှင် သို့ ဒေါ်လာ ၅ သန်း ကူညီထောက်ပံ့မည် ဖြစ်ကြောင်း ထုတ်ဖော်ပြောဆိုခဲ့သည်။

ထို့ပြင် အာဆီယံ-ဩစတြေးလျ ထိပ်သီးအစည်းအဝေးတွင် ဩစတြေးလျနိုင်ငံက အရှေ့တောင်အာရှနှင့် ပစိဖိတ်ဒေသတွင် ဘေးကင်းလုံခြုံမှုရှိပြီး ထိရောက်သည့် COVID-19 ကာကွယ်ဆေးများကို အားလုံးက ရရှိခံစားနိုင်ရန်အတွက် ဒေါ်လာ သန်း ၅၀၀ ကူညီထောက်ပံ့မည်ဖြစ်ကြောင်း ထုတ်ဖော်ပြောဆိုခဲ့သည်။

နိုင်ငံတော်၏အတိုင်ပင်ခံပုဂ္ဂိုလ်နှင့်အတူ (၂၃)ကြိမ်မြောက်အာဆီယံအပေါင်းသုံး ထိပ်သီး အစည်းအဝေးနှင့် (၁၅) ကြိမ်မြောက် အရှေ့အာရှထိပ်သီး အစည်းအဝေးတို့သို့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဦးသောင်းထွန်းနှင့် အပြည် ပြည်ဆိုင်ရာပူးပေါင်း ဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဦးကျော်တင်တို့လည်း ပါဝင်တက်ရောက်ခဲ့ကြသည်။